20
← الرئيسية
ثمن الدبلة

ثمن الدبلة - الجزء الأول

ثمن الدبلة - الجزء الأول



أول ما باب الشقة اتقفل عليهم، سابت ندى الشنطة الصغيرة من إيدها ورمت نفسها على أقرب كرسي وهي بتضحك من التعب.

- أخيرًا! أنا حاسة إن الكوافير دبّس في دماغي نص كيلو دبابيس. تعالى يا كريم ساعدني قبل ما رقبتي تتكسر.

كريم ما اتحركش من مكانه، واقف عند الباب ماسك مفاتيح الشقة بإيد بتترعش، وبيبصلها بنظرة عمرها ما شافتها فيه. مش نظرة عريس في ليلة فرحه، دي نظرة واحد بيبص على حاجة كان فاكرها أغلى حاجة في الدنيا واكتشف إنها مضروبة.

ابتسامتها بهتت وقالت:

- مالك يا كريم؟ شكلك مش طبيعي.

- اقعدي.

- أنا قاعدة أصلًا.

- قلت اقعدي، وماتتحركيش من مكانك. هتفضلي قاعدة بفستانك وطرحتك ده لحد الصبح، ومش عايز أسمع نفَسك.

ضحكت ضحكة قصيرة مرتبكة، فاكراها واحدة من هزاراته السخيفة:

- ما تخضنيش يا وكيل النيابة، الليلة دي مش ناقصة.

- أنا بقالي ست سنين في النيابة يا ندى. بعرف الكدب من أول جملة. وأنتي من اللحظة دي كل كلامك عندي كدب.

الضحكة وقعت من على وشها واتسعت عينيها:

- كدب إيه؟ أنا عملت إيه يا كريم؟ إنت بتتكلم جد؟

زعق فيها زعقة هزت الصالة:

- جد أوي! وفوقي لنفسك، أنا كريم بيه، مش طفل هتضحكي عليه بدموعك!

- بس أنا...

- ولا كلمة! أنا ما عملتش فضيحة وأطلقك قدام الناس في القاعة مش علشانك، علشان هبة أختي المسكينة اللي نصيبها تتجوز أخوكي في نفس اليوم. ولولا إني خوفت أخوكي يعمل راجل ويسيبها في ليلة فرحها زي ما أنا هعمل معاكي، كنت رميتك وسط الناس كلها. بس حظك حلو.

ندى كانت واقفة مشلولة، مش قادرة تستوعب. وهو ابتسم ابتسامة مريرة:

- أسبوع. هسيب هبة تفرح أسبوعها مع عريسها، وبعدها أطلقك. واللي أخوكي يحب يعمله يعمله.

- طلاق إيه يا كريم؟! أنا بحبك من وأنا في تانية ثانوي!

- ده كان قبل ما أعرفك على حقيقتك.

قالها ودخل أوضة النوم وقفل الباب. لحظة وفتحه تاني فتحة صغيرة وقال من غير ما يبص لها:

- ومن النهارده في البيت ده، ماتلمسيش حاجة من حاجتي.

وقفل الباب بالمفتاح.

فضلت ندى قاعدة مكانها، والفستان تقيل على كتافها، وصوت زفة هبة لسه جاي من بعيد مع أغاني الفرح اللي ما خلصتش. وسط الدوشة دي حسّت أول مرة إن الوحدة ليها صوت.

وجوه الأوضة، وراء الباب المقفول، كان كريم واقف مسنود على الحيطة وحاطط إيده على بقه علشان صوته ماييجيش بره، وكتافه بتهتز. بعد ما كان فاكر نفسه بيعاقبها، اكتشف إنه هو المعاقَب الأول.

التليفون على الكومودينو نور بإشعار جديد، رقم غريب كتب:

«مبروك يا وكيل النيابة. هتعمل إيه في عروستك بقى؟»

يتبع...